في لحظة امتزجت فيها الفرحة بالدهشة، عبّر الطالب حمدي فرج حمدي فرج، الحاصل على المركز الأول على مستوى الجمهورية في شهادة الدبلومات الفنية 2025 – تخصص تكنولوجيا المعلومات والحاسبات – عن سعادته الغامرة بتصدر قائمة الأوائل، مؤكدًا أن النتيجة كانت فوق توقعاته، لكنه حصد ثمرة جهد كبير بذله طوال العام.
وقال حمدي، الطالب بمدرسة “I-Tech” الثانوية المتقدمة للتكنولوجيا التطبيقية بمحافظة القاهرة
“مكنتش متوقع خالص أكون من الأوائل، ولا حتى المجموع الكبير ده.. لكن الحمد لله، فرحتي النهارده لا توصف”.
وقد حصل حمدي على مجموع 977 من 1000 بنسبة نجاح 97.7%، في تخصص يجمع بين دراسة تكنولوجيا المعلومات وتطوير تطبيقات الموبايل، ما يتطلب توازنًا دقيقًا بين الدراسة الأكاديمية والعملية.
وأضاف:
“السنة كلها كانت صعبة، بس آخر 3 شهور كانوا الأصعب بجد.. كنت بذاكر لمنهج المدرسة وفي نفس الوقت بذاكر للتخصص، وده محتاج مجهود مضاعف وتركيز كبير”.
وعن الدعم الأسري، أكد حمدي أن والده كان أكبر داعم له:
“أكتر حد دعمني والدي.. هو مدرس لغة عربية، وكان بيساعدني في المذاكرة وبيسهر معايا لحد ليلة الامتحان، والبيت كله كان بيهيألي الجو المناسب”.
وعن طموحه المستقبلي، قال حمدي:
“نفسي أشتغل في شركة إنترناشونال، وأدخل كلية هندسة أو كلية تكنولوجيا المعلومات.. وأطور نفسي في المجال اللي بحبه”.
واختتم حمدي حديثه برسالة لزملائه من طلاب التعليم الفني:
“ركزوا على التخصص بتاعكم، ومتهملوش الدراسة العامة.. والتوازن بينهم هو المفتاح الحقيقي للنجاح”.
