خرج الحاج رجب بحة، ليرد في بث مباشر على تصريحات المستشار مرتضي منصور والتي اتهمه فيها بالسحر لحساب النادي الأهلي، قائلا: “حرام عليك تشوه سمعتي ومعايا بنات على وش جواز وحافظ القرآن.. سيادة المستشار متهمني بالباطل إن أنا بسحر”.
وأضاف رجب بحه، في فيديو بث مباشر: “أنا راجل أمي لا بعرف أقرأ ولا أكتب ولا بعرف أعمل حاجة، وقسمًا بالله العظيم، قسمًا بالله العظيم مرة تانية، إني ما بعرف أعمل الحاجة دي، وإللي بيعملها بيقي مشرك بالله، وأن راجل شغال بنا عامل بإيدي، شغال أرزقي، ولو تيجي تتفرج على المعيشة اللي عايشينها، وبيتي إللي عايش فيه، مش هترضاه لنفسك، وسمعتي وسمعة ولادي، كده غلط وكده ما ينفعش، وحرام عليك لما تشوه سمعتي بالطريقة دي، ومعايا عيال وبنات على وش جواز، وأنا حافظ قرآن”.
فيما قال أحد أهالي قرية منية الحيط بمركز إطسا في محافظة الفيوم، «يا سيادة المستشار دا الراجل اللى انت بتتكلم عنه، وانت راجل دولة، إزاي تتكلم بالطريقة دي على الناس، وإزاي بتتهم الناس بالباطل عشان واحد قالك كلمتين تطلع على الهوا، في بث مباشر تتكلم على ولاد الناس، الراجل دا لا يعرف الأهلي ولا يعرف الزمالك، دا راجل بنا، راجل أمي لا يعرف كيف يكتب اسمه، إزاي بتتكلم عنه بالأسلوب دا على الهوا، وعنده أولاد وعنده عيلة، الكلام دا غلط يا سيادة المستشار، إنت ما بتقبلش في أولادك كلمة، إزاي تقبل تتكلم كده عن ولاد الناس، دا تهريج، راجل معاه أولاد وأسرة إزاي يتكلم عنه كده، وهو دا اللى خللي الزمالك يتغلب (4-1)، سحر إيه،هي الكورة فيها سحر؟».
وكان المستشار مرتضي منصور، قد عرض صورة أحد الأشخاص في بث مباشر وذكر اسمه وقال إنه يقيم في الفيوم في قرية منية الحيط بمركز إطسا في الفيوم، وذلك بعد تعرض الزمالك للخسارة أمام الأهلي بأربعة أهداف مقابل هدف، في المباراة التي أقيمت بينهما الخميس الماضي، ضمن مؤجلات الجولة الحادية والثلاثين من بطولة الدوري الممتاز.
