كشفت الفنانة الشابة إيناس عز الدين عن خضوعها لعملية جراحية طارئة في عينها اليمنى، وذلك نتيجة تعرضها لخطأ طبي تسبب في تفاقم حالتها الصحية بشكل كبير.
ونشرت إيناس صورة لها عبر حسابها الرسمي على موقع فيسبوك، أظهرت فيها آثار الإصابة في عينها، معلقةً:
“خضعت لعملية عاجلة في عيني، رغم أنني أعاني من فوبيا شديدة تجاه عمليات العيون. مجرد فكرة إن حد يلمس عيني أو إني أشوف اللي بيحصل حتى وأنا تحت التخدير، بتخليني جسمي كله ينتفض والله.”
وتابعت قائلة:
“دخلت عمليات كتير قبل كده تحت تأثير التخدير الكلي، ومعنديش مشكلة فيها. لكن فكرة إني أكون صاحية وعيني مفتوحة وأشوف الإبر وكل حاجة وهي بتدخل عيني، دي تجربة مرعبة بالنسبة لي.”
وأضافت:
“ادعولي العملية تعدي على خير، لأن فعلاً مش قادرة أوصف إحساسي. كل ده حصل نتيجة خطأ طبي ومتابعة خاطئة كمان. الطبيبة كانت بتأكدلي إن عيني كويسة والجرح بيلتئم، في حين إن الحالة كانت بتسوء يوم بعد يوم. بدأت بمشكلة بسيطة – محتاجة بس قطرة ومضاد حيوي وراحة يومين – لكن الموضوع اتطور لجرح بعمق 4 ملليمتر، وتليف في جزء من الملتحمة، وانتهى الأمر بعملية جراحية وخياطة. ليلة كبيرة مكنتش مستاهلة كل ده.”
وختمت رسالتها بدعوة متابعيها للدعاء لها في هذه الظروف الصعبة.
