علقت الفنانة الكبيرة ليلى طاهر، على شائعة وفاتها والتي انتشرت على مواقع التواصل الاجتماعي، مما أثار قلق محبيها، قائلة: “أنا سعيدة بالخبر ده، علشان بحس بحبكوا ليا، لما يمكن يقصدوا إنهم يزعلوني لكنهم أسعدوني، وأنا مش فاهمة جابوا الخبر ده ومش أول مرة، وكل شهر بيكتبوا الخبر، وهما مش لاقيين حاجة يكتبوها”.
وأضافت ليلى طاهر، خلال مداخلة هاتفية لبرنامج “ملفات” الذي تقدمه الإعلامية أميرة بدر: مروجو الشائعات فلسوا مفيش أخبار ولا صحافة ولا أي حاجة.. اتكتبت بالنسبة لفنانين وفنانات كتير، وأتكرر بشكل كبير، وطلعت كلها أكاذيب وإشاعات.
واستكملت: أنا بحب الفن بكل صوره، تلاقيني في وقتي الفاضي كله بتفرج على التلفزيون بشوف المسلسلات والوجوه الجديدة، والأعمال الفنية الحلوة وسعيدة إن الفن المصري بيرجع لأصله تاني، لأنه مر بوعكة بسبب الظروف اللي حصلت في البلد، بقوم الصبح أقرأ الأخبار في الموبايل، وأشوف الرسائل وأرد عليها، وبعدين أقوم أمشي في الجنينة وألعب مع الكلاب شوية، وأشوف لو ورايا حاجة أعملها ورايا زيارة مهمة، أروح النادي، حياة أسرية الفن كان واخدني منها شوية.
وأما عن عودتها للفن مرة أخرى، قالت ليلى طاهر عن اعتزالها: مينفعش أرجع دلوقتي للفن، وكان نفسي ومنى عيني أستمر في الفن لأخر يوم في عمري، والتوقف اللي حصل خلاني أتوقف، ومجاش ليا دور حلو لغاية دلوقتي، وأتعرض عليا أدوار مش بنفس المستوي، وأرجع بحاجة قوية جدًا يا بلاش، واللي أنا عملته مبسوطة وأفتخر به.
