أعرب الفنان بيومي فؤاد عن استيائه من تفكير بعض جماهير نادي الزمالك بعد خسارة فريقهم برباعية أمام النادي الأهلي، وفي تصريحاته التلفزيونية، قال بيومي فؤاد: “عمري ما غلطت ولا قلت أدبًا على جماهير الزمالك، أنا ربنا خلقني أهلاوي، إيه المشكلة؟ الزمالك لو اتغلب من ريال مدريد هيدوروا على أي حاجة غير إنهم وحشين.”
أضاف بيومي: “شيكابالا قال لعمرو أديب لو كورة هناخد الدوري، يعني إيه كورة؟ هو إحنا بنلعب بلي؟ امتى هتقولوا إنكم اتغلبتوا النهاردة علشان وحشين أو اللي قدامكم كانوا كويسين.” وأكمل حديثه قائلاً: “لما الزمالك خد كأس مصر من الأهلي قلت على الأهلي دا إحنا غلابة النهاردة ووحشين، هما لما يخسروا بيعلقوا شماعات ومبررات الخسارة منها الظلم والتحكيم والمؤامرات والسحر، الزمالك بيتجامل والأهلي بيتجامل، الزمالك بيتظلم والأهلي بيتظلم، ولكن هناك أمور أخرى وراء الخسارة لا بد أن يواجه الزمالك الواقع ويعترف بالتقصير والخلل والمشاكل بعيدًا عن الشماعات.”
وتابع بيومي فؤاد: “اشمعنا احنا كلامنا اللي بيبقى مُر ولو الزملكاوي شتم وقل أدبه يبقى كويس، الزملكاوي بيقول لو كرة زيزو دخلت طيب ما كرة أفشة جت في العارضة، ده ماتش 6/1 بيقولوا لو كورة وليد صلاح عبد اللطيف دخلت كان الزمالك كسب، هو ده كلام يُعقل.”
أوضح الفنان بيومي فؤاد أنه يتعرض لانتقادات دائمة بسبب دعمه للنادي الأهلي، قائلاً: “قلت الأهلي لعب حلو، هي دي قلة أدبي اللي بتشتم عليها في كل حتة، نفسي في مرة الزمالك يطلع يقول احنا اتغلبنا عشان احنا وحشيين لو قالوا ده هيروحوا في حتة تانية.” وأرجع أحد أسباب خسارة نادي الزمالك في الدوري الممتاز وتراجع مستواه الفني إلى افتقاد النادي لعدد كبير من لاعبيه، إلى جانب الظروف الإدارية التي يمر بها وبعض المشكلات المتعلقة بإيقاف قيد النادي.
