أثارت الفنانة انتصار الجدل مجددا بتصريحاتها حول الرجل والمرأة، وذلك خلال برنامجها “من غير نفسنة”، الذي تقدمه مع الفنانة بدرية طلبة ونوليا، عبر شاشة قناة “هي”.
وقالت الفنانة انتصار: الحالة الميؤوس منها هي اللي بتجمل كلمة السنجلة علشان تداري الألم والوجع اللي حصلها من الانفصال، في رجالة كتير حلوة بس مفيش جواز لأن البنات خرجت تشتغل فالرجالة قعدت على القهاوي، هيتجوزوا منين ما إنتوا خدتوا مكانهم، فأنا رأيي انسحبوا من سوق العمل وسيبوهم هما يشتغلوا.
وأضافت: البنات ساعات بتلجأ أنها تقول أنا سينجل من باب أنه مجاش حد، فبدؤا يروجوا لفكرة السينجل علشان متقولوش أنها معنسة أو متأخر الجواز، أو مطلقة ومجاش لها عريس عايز يتجوز تاني، دي تقيلة برضو، وكل ما يبروز أنها غير مرغوب فيها فتقول إنها سينجل مع إنها نفسها تتجوز ويكون لها بيت وأسرة.
وتابعت: الحياة مش حب وبس، الحياة اتنين بيساعدوا بعض، وبيحلموا مع بعض وبيفوتوا لبعض، وبيحطوا إيديهم في إيد بعض علشان يواجهوا الدنيا، والمروجين للسنجلة ضدكم وضد كل الستات، وضحكوا علينا وقالوا لينا اشتغلوا عشان نشتغل فالرجالة تضايق، وخدنا مكانهم والرجالة بقى عندها بطالة، وأنا بقول الكلام ده على مسؤوليتي.
واختتمت: ضحكوا علينا وبقينا سناجل، 40 سنة وسينجل؟ يعني هتعملي إيه هتكمليها سينجل؟، مترضيش بضغوط من أي راجل في الدنيا وخليكي واثقة من نفسك.
